आली दिवाळी, करा खरेदी

NewsZenn Nov 3, 2020 1213 0

ऑनलाईन व ऑफलाईन बाजारपेठा सज्ज

अवघ्या १० दिवसांवर आलेल्या या दिवाळीच्या खरेदीसाठी बाजारपेठा सजल्या आहेत नवरात्रौत्सवानंतर पंधरा दिवसांनी दिवाळी ला सुरवात होत असल्याने दसऱ्यानंतरच दिवाळी लगबग सुरु होते. यंदाच्या दिवाळीवर कोरोनाचे सावट असल्याने ग्राहकांबरोबरच व्यापाऱ्यांमध्येही भीतीचे वातावरण आहे. करोडोची उलाढाल होणाऱ्या पिंपरी मार्केटमध्ये बाजारपेठ सजली आहे. पण, माल पडून तर राहणार नाही ना अशी भीती व्यापाऱ्यांमध्ये आहे.

''दरवर्षी दसरा दिवाळीच्या काळात करोडो रुपयांचा माल आम्ही घाऊक बाजारातून उचलतो, विविध फॅशनच्या, नवनवीन व्हरायटीच्या कपड्यांना मोठ्या प्रमाणावर मागणी असते. यंदाही तयारी केली आहे पण, कोरोनामुळे ग्राहक येईल का ? माल संपेल संपेल का? याची धास्ती आहे. पाऊस उघडल्यामुळे थोडं सकारात्मक वातावरण आहे. चार दिवसांपासून ग्राहक येऊ लागले आहेत. पुढील आठवड्यात लोक खरेदीला बाहेर पडतील अशी अशा वाटते.''
मुकेश मेवानी, कपडे व्यापारी

दिवाळी वर्षातून एकदा येणार सर्वात मोठा सण त्यांमुळे दिवाळीसाठी खरेदी मग ती ऑनलाईन असो किंवा ऑफलाईन खरेदी तर होणारच. विविध आकाशकंदील, पणत्या,हँगिंग पणत्या, लाइटिंग, रांगोळ्या शोभेच्या वस्तू, दिवाळी गिफ्ट ची दुकाने यांनी संपूर्ण बाजारपेठ सजली आहे. कोरोनाची भीती असली तरीही ग्राहक सणाचा आनंद घेण्यासाठी बाहेर पडत आहेत. सगळ्याच वस्तू ऑनलाईन खरेदी करणं शक्य नसल्याने दिवाळी फराळाचे सामान, किराणामाल, घरातील इतर लहानसहान वस्तू यासाठी घराबाहेर पडून मनासारखी खरेदी करावी लागते. त्यामुळे बाजारात गर्दी दिसू लागली आहे.

''कोरोनामुळे यंदाची दिवाळी ग्रँड दिवाळी नसली तरीही ती साजरी करणारच. गर्दीत जाणार नसून सोशल डिस्टंसिन्ग च्या साहाय्याने खरेदी करणार आहे. काही गोष्टी जरी ऑनलाईन घेतल्या तरी आकाश कंदील, रांगोळी, शोभेच्या वस्तू बाजारात जाऊन खरेदी करण्यात व दिवाळीच्या लायटिंगची मजा घेण्यात जो आनंद आहे ना तो ऑनलाईन शॉपिंग मध्ये नाही.''

मानसी साठे, ग्राहक

ऑनलाईन खरेदीलाही प्राधान्य

कोरोनाच्या पार्श्वभूमीवर दुकाने, मॉल्स बरोबरच ऑनलाईन बाजारपेठही जाहिरातींच्या व सवलतींच्या आधारावर ग्राहकांना आकर्षित करत आहे. यंदाच्या वर्षी दिवाळीच्या खरेदीसाठी ऑनलाईन मार्केट सज्ज झाले आहे. कोरोनामुळे ऑनलाईन खरेदीचा फायदा ग्राहक घेणार असा विश्वासही विक्रेत्यांना आहे, त्यामुळे छोट्यातला छोटा ब्रॅण्डही ऑनलाईन बाजारपेठेत उतरला आहे. किराणामाल, कपडे, बूट, सौंदर्यप्रसाधने, इतर घरगुतीवस्तू यांवर आकर्षक सूट देऊन ग्राहकांना आकर्षित केले जात आहे. एकाच छताखाली सर्वच उपलब्ध असल्याने वर्क फ्रॉम होम करता करता खरेदीचा आनंदही ग्राहक घेत आहेत.

'' स्वस्तात मस्त आणि ब्रँडेड वस्तू मिळत असल्याने मी नेहमीच ऑनलाईन खरेदी करतो, यंदा कोरोनामुळे बाहेर पडून खरेदी करणे तसं रिस्की वाटत असल्याने घरात राहून सुरक्षितपणे घरातील सर्व सामानापासून ते कपड्यांपर्यंत सगळंच मी ऑनलाईन घेणार आहे.''
अनिकेत दवे, ग्राहक

थोडक्यात काय, ऑनलाईन खरेदीला लोकांची ना नाही पण दुकानात गेल्याशिवाय खरेदी पूर्णच होत नाही असं म्हणायला हरकत नाही. खरंतर कोरोनाच सावट कितीही गडद असलं तरीही या सणांच्या निमित्ताने का होईना बाजारात सकारात्मकता पाहायला मिळत आहे. त्यामुळे कोरोना ने आलेली मरगळ कमी व्हायला दिवाळीचा सण कारणीभूत ठरेल हे नक्की.